金都.婚攝.血淚史015:張小姐(下)|陳家富

20160516 張小姐 下

 

《金都.婚攝.血淚史》連載中

有血有肉,賤賣青春
震撼 700 萬人嘅攝影佬成長日記

「金都,就是我們的獅子山精神」

作者:陳家富
圖片:陳家富及游永富
wesellyouthcheap@gmail.com

 

上回提到:

013:張小姐(上)

014:張小姐(中)

 

<015> 張小姐(下)

 

同當事人自首後,就要同老細自首。平時十個客有九個擺完酒第一時間就會打上公司發爛渣投訴師傅乜乜乜,乘機搏番多少著數,我今次斷到咁正都瞞唔到幾耐,唯有認衰。

 

「哦,死卡下話。」個語氣平靜到不得了,咁得人驚?我演出一個半真半假嘅淆底樣搏同情,佢果然繼續安慰我。

 

「成日都有架啦,我地咁多生意,啲卡日日用,壞有乜出奇?……」咁豁達呀老細?不過,我係人為疏忽喎……

 

「……呀邊個邊個試過自己整唔見個客啲相,差啲要跪響度求個客唔好報警,幾好笑呀!」做得老細,讀心應該係必須技能,比佢篤中咗我更加無嘢講。

 

隔咗一分鐘,沉默。內疚嘅我決定鼓起勇氣:「賠……賠錢果度……」

老細:「係都係賠返 Video 果份姐,有交相架嘛。遲啲先算啦!」

佢咁樣講,我好似有多少放心,好似賠錢都賠到慣曬咁喎,係咪無事喇?

 

不過,呢句「遲啲先算」,係日後我同老細開大片嘅導火線,遲下同大家分享。

 

至於張小姐果邊,我就唔敢再打電話比佢喇,佢一定會覺得我把聲好難聽好難聽。話口未完,第二日公司 Top sales P 姐就打比我喇。

 

「喂富仔?!乜你搞啲咁嘅嘢個客大左肚架佢打比我係咁喊係咁喊鬼死咁淒涼我都唔知點安慰佢好……」 滿口鄉音而且講話極快嘅 P 姐一輪咀掃埋嚟,我淨係知事態真係幾嚴重,一定要為個客人做番少少事了。

 

於是,我用 Whatsapp 同佢再鄭重道歉。然後向佢提出可以幫佢用相,去砌返條行禮嘅片出嚟。我知,係好戇居嘅提議,結果送出訊息之後,一路都無回音。

 

直至兩個月後,張小姐卒之回覆:「相就係相,片就係片。有咩用呀?」呢兩個月嘅等待換來呢句嘢,老實講係有被救贖嘅感覺。大佬,點知佢屈埋屈埋會做啲咩出來呀,仲要有個 BB 響個肚度呢?

 

於是我馬上再提議:「如果當日有親友用電話相機拍低咗片,我都可以幫你剪返一條片出來的,一百個一千個親戚拍低咗我都可以幫你組合曬佢落一條片度。」

 

九個月後,張小姐卒之正面回覆我!而且有三至五段親友用手機影嘅低清手震仲要係打直影嘅片,即係話佢容許我幫佢補飛!於是我就專門開咗一個叫「張小姐」嘅 Folder,入面放曬佢提供嘅所有相關 video,馬上開始救亡工程。

 

呢段時間我剪好馬上比佢,過一陣佢就會要我改,我再馬上改好比佢。不停改不停改,有時佢再 send 兩張相過來叫我加入去,有時話想用邊個邊個隻歌,我完全照做。

 

事隔兩年,改咗五次之後,張小姐卒之無再搵我。係咪代表收貨?當然唔係,我好清楚個婚禮紀錄無 9 咗就係無 9 咗,始終係無得救的。萬一佢突然要上網唱衰我,係絕對無問題的。我好好彩,張小姐同埋佢先生都十分好人,到呢一刻為止,我仍然健在。

 

直至今日,我部電腦仍然將「張小姐」個 Folder 擺響當眼位置:一來佢隨時想改,我就有責任幫佢改,無限次。二來提醒自己,收人錢提供服務,同興趣性質影完拍下蘿友就行咗去的龍友係有分別的。即使好多龍友影相拍片靚過我,但接咗委託的攝影師,係多咗一份責任的,有時候,呢份責任可能有一個 BB 仔咁重。

 

上回提到:

013:張小姐(上)

014:張小姐(中)

 

《金都.婚攝.血淚史》連載中

Series Cover

有血有肉,賤賣青春
震撼 700 萬人嘅攝影佬成長日記

「金都,就是我們的獅子山精神」

作者:陳家富
圖片:陳家富及游永富
wesellyouthcheap@gmail.com

 

更多資訊,請留意蔓珠 FB 專頁

 

留言

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s