金都.婚攝.血淚史014:張小姐(中)|陳家富

20160511 金都 014 2

 

《金都.婚攝.血淚史》連載中

有血有肉,賤賣青春
震撼 700 萬人嘅攝影佬成長日記

「金都,就是我們的獅子山精神」

作者:陳家富
圖片:陳家富及游永富
wesellyouthcheap@gmail.com

 

上篇:013:張小姐(上)

「仆街喇!尋日嗰場童話式婚禮呢?」哈哈,已經比今日果對新人 Overwrite 咗喇。哈哈,我 format 咗尋日錄低嘅所有嘢,眼瞓吖嗱。哈哈,所有嘢都返唔到轉頭喇。哈哈,轉行事小,點賠返個婚禮比人?我標曬冷汗,腦入面有六七個最壞打算,但係一個補救方法都無。

 

<014> 張小姐(中)

 

最初發現自己錯手整唔見咗客人嘅片,我係拒絕(接受現實)的。第二日我就跑落去電腦商場垂死掙扎,所有話識修復記憶卡嘅鋪頭我都問過曬。結果比十幾間鋪頭夾埋呃咗幾百蚊「檢查費」之後,都係換嚟一句「你寫咗嘢上去,無得搞喎。」我唔敢同老細講,又唔敢同賤 Man 佢地商量,於是我搵自己嘅朋友飲酒,同一班行外人告解,尋求心靈嘅慰藉。

 

「喂,如果你結婚啲相,err……或者片啦……個攝影師話唔見曬,一張都無淨,你有咩反應?」

「屌到佢飛天囉!」

「賠錢有無得搞……?」

「……你唔係咁大劑下嘛……?」

 

班老死知道咗我奶鑊勁之後,氣氛即刻變得沉默。平時有講有笑嘅 Happy Hour,突然唔知講乜好。一班年近三十嘅麻甩佬,開始諗方法去安慰另一個麻甩佬。

 

老死甲:「東家唔打打西家啦,我公司而家都請緊人嘅……」

老死乙:「你試下同個客講,『愛是不保留』吖嘛……哈哈……」

老死丙:「激情握喺手會化為烏有呀……叫佢地擺喺心入面啦……吖都係叫佢地唔好擺喺心入面喇……」

 

結論係難逃一死,唯有接受命運嘅審判。當晚我用三十分鐘,戰戰競競咁輸入客人嘅電話號碼,始終都要講清楚件事。

 

「張小姐……其實就咁嘅……我係前幾日幫你拍婚禮果個錄影師……果日拍完之後呢,我返咗屋企發現自己開唔到張卡……張卡好似有啲問題……」

 

係,我係講大話。點解要講大話?唔使問喇卦?就算真係一死謝天下,條片都唔會返嚟啦,自保係人之常情。但係呃人之後,罪疚感只會更重,係大自然定律。

 

電話嘅另一面,馬上傳嚟喊聲。一如所料,「點樣賠返個婚禮比我」係重點。我除咗話「一定退錢」,已經唔知講咩好。「我要返啲錢嚟做咩呀?」亦都係自然反應。最後,響乜都未傾掂(其實都無得傾掂)嘅情況之下,張小姐就收咗線。我囉住個收咗線嘅電話,發左好耐吽哣,個腦空白一片。

 

我班行家成日教導我:世界上最仆街嘅就係香港人,而香港人之中最仆街嘅就係我地公司嘅客人。無事發生都可以諸多要求,出事嘅時候一定會義不容辭送你上路的。一諗到呢度,冷汗越標越勁。我使唔使上報?使唔使比人網路公審?使唔使比人告上法庭,告到我破產?我無產架喎!

 

(待續)

 

上篇:013:張小姐(上)

 

《金都.婚攝.血淚史》連載中

Series Cover

有血有肉,賤賣青春
震撼 700 萬人嘅攝影佬成長日記

「金都,就是我們的獅子山精神」

作者:陳家富
圖片:陳家富及游永富
wesellyouthcheap@gmail.com

 

更多資訊,請留意蔓珠 FB 專頁

 

留言

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s