中間超人的思考藝術|柏斯迪

20160509 中間超人

 

我有一個朋友,為了令自己真係,真係見證到中間超人黃成智講述佢的中間路線主張係怎樣一回事,於是邀我結伴前往「基督徒與政治人對話--政治參與的道德與倫理」講座系列第三場「轉軚與忠誠--信仰政治倫理」,諗住聽清楚嘉賓新思維創黨主席狄志遠及創黨成員黃成智講下佢黨係做乜啦,點知愈聽愈唔清楚……

 

「你隔離條友,應該是記者。」

 

「你後面都係記者。」

 

「其實點解仲會有記者?」

 

「是旦啦,開始嘞。佢話見到社會好多不公義發生……如果只係抗爭,係乜都冇,要溝通同談判。咦!佢話自己支持民主,匯點係第一批話要民主回歸喎。」

 

「佢話透過自己影響力,去為社會帶來改變。其實佢的影響力好少……最多都係以前嘅北區,但現在北區正面面對中港矛盾,佢的中間路線完全係笑話,北區是最勇武嘅本土支持者,因為深受其害。」

 

「溝通妥協有幾新呢?其實點聽都係舊思維,按佢剛才所說,呢種思維,佢地在回歸前已經有啦……無人理鳩佢地之麻,咁又再一次證明,佢地無牙力,無影響力……咁佢今日點樣透過自己影響力行中間路線呢?」

 

「所以新思維應該係改錯名……搞搞佢啦好嘛?」

 

「佢話,連提出提委會一半係自己選呢個諗法,都唔可以。八三一框架支持,普選特首又支持,好矛盾喎。」

 

「即係袋住先囉,因為睇到唔會拎得走八三一框架嘛,務實做法喎。都啱的,好務實,袋下袋下就一世姐。」

 

「其實我真係睇唔到佢條底線喺邊,你都要有底線先知點妥協架?定其實冇?」

 

「佢話,今次補選做得唔好,因為政治掛帥大於政策論述,但中間路線本身就是政治掛帥喎。」

 

「佢一方面又話人地政治化,佢係做社區政策,但佢有政策論述嗎……非諷刺,真心疑惑。」

 

「其實,中間超人的人生幾坎坷,佢一直半紅不黑,在民主黨好似無乜點上到位,人老啦,已經失去年輕的思維。佢早幾年有好多師奶支持,包括華明,現在華明已是琦粉。」

 

「陰公,坎坷過後冇艇搭。」

 

「狄志遠問,點解會比呢條題目佢地,呃……我都唔知講乜好。」

 

「聽到呢度終於聽到少少佢地支持乜政策:中間路線認為一國兩制最能夠,維護香港權益。呃……一國兩制總比一國一制好,兩制又比獨立好……我都唔知講乜好。」

 

「沒有多少深度,其實你反對港獨,可以講得好好多。」

 

「唉,而家終於聽到少少關於新思維點解係新思維的原因,以我努力理解啦,佢認為大家覺得抗爭係正面,談判係好軟弱的表現,所以新思維應該係想打破呢個好軟弱的諗法。呃,真係好不容易。」

 

「好不容易,好不容易,好不容易聽到了。龔立人教授,好彩有佢講野,否則今天真是浪費時間……我指增進知識方面……」

 

「對!教授說以亞里士多德的想法理解,中庸是剛剛好,多咗的妥協是什麼?冇自己立場,出賣自己,人地講乜就講乜;少咗的妥協係固執,絕對主義。嗯,你懂的。」

 

「問答環節呢家嘢總係精彩的。叔叔問,搵食姐我明,但你作為基督徒,你有無忠於信仰呢?耶穌是不參政。好想聽叔叔再駁啊。我覺得叔叔係鄙視佢撈民主油水,非真正支持民主。」

 

「唉,好慘,至少有三個人問,你要同中國政府又傾又砌,可以,但你可唔可以講你點同佢溝通啊?你唔好再講你個黨只係成立咗幾個月,所以比啲時間你啦好唔好?」

 

「經常問你諗住點做點行新思維,但你的回應往往都以自己是新政黨要時間來傾,咁點解你唔傾好先出黎面對公眾呢?你連自己個黨,無論是核心的內圍定核心的外圍都未諗好,你唔好搞笑啦!!!!!」

 

「問到第四次,佢終於講張德江就嚟訪港,準備以文字等形式表達意見……」

 

「_!你 send email 比張德江嗎?」說時遲那時快,有人舉手發問:「唔好介意我問得具體少少,你打算遞信嗎?你覺得佢會睇?如果佢唔睇,你有乜跟進呢?」

 

「佢終於肯答了!渠道係有的,至於佢聽唔聽,就要靠我地黨的影響力了,咁影響力呢,我地要努力了。最後以我地係新政黨,歡迎大家邀請分享作結……」

 

「唉,其實佢地真係被遺忘的第二梯隊,做牛做馬,光環都是上一代,而牛,是沒有想法的,所以他們連新思維新在哪,也只能用一個方法,即又傾又砌,溝通呢類放諸各門派都會用的手段,當是自己黨中心思想。成件事可笑又可悲,在泛民那麼多年,只學會詭辯,顧左右而言他,牛頭不對馬嘴,連捍衛自己的信念都不能,怎樣指望他們真正中間路線。」

 

「其實最大問題係誠信問題。」

 

更多資訊,請留意蔓珠 FB 專頁

 

留言

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s