金都.婚攝.血淚史013:張小姐(上)|陳家富

20160502 金都 013

 

《金都.婚攝.血淚史》連載中

有血有肉,賤賣青春
震撼 700 萬人嘅攝影佬成長日記

「金都,就是我們的獅子山精神」

作者:陳家富
圖片:陳家富及游永富
wesellyouthcheap@gmail.com

 

<013> 張小姐(上)

 

踏入十月,香港係日日都有人結婚。公司日日都有生意,連我呢啲做唔夠一個月嘅新仔都要上最前線。呢個月,老細交咗廿三張單比我,往後咁多年都無一個月破到呢個紀錄。我必須對當年嗰廿三對新人道歉:當時嘅我應該係見到單上面嘅地址就去、見到人就開機、見到利是就講多謝、見到乳豬就食,食到第二日已經便秘……係一個神志不清嘅十月。

 

而當中有一對客人,係一定要記低佢。呢件事需要記一世。

 

我向賤 Man 訴苦,而佢嘅回應係:「廿三單咋?我連廿三都試過啦!」

「吓……咩係連廿三呀?」無聽錯啩?

「關公連三十都嚟緊喇!」關公若無其事響一二邊 set 緊閃光燈,佢仍然係開幾多日工都面不改容嘅浪子。

 

現場係港島區某間教堂入面,兄弟姊妹盡最後努力佈置場地。今日係我第一次影教堂,儀式、程序、流程等等全部都未見過,理應要打醒十二分精神。但由於今日係一張半日單,影完個教堂行禮就可以返屋企訓餐飽,我個心得返「收工」兩隻字。

 

不幸地,今日對新人絕對可以用「金童玉女」去形容。新娘由爸爸帶進場的時候,有一刻以為自己拍緊電視劇,「使唔使咁靚女?」人係衰格嘅,靚嘢係自動自覺擺多啲心機落去做,我衰格。

 

「呢 pair 客點會幫襯我地架,無天理呀。」細細聲。

「小弟認同。」細細聲。

「唔。」細細聲。

 

新郎接過新娘嘅手之後,我捕捉到兩個甜到漏出嚟嘅笑容。莊嚴嘅教堂、神聖嘅結婚進行曲、盛裝而守禮嘅來賓、模特兒級數嘅新郎新娘,同埋三個嚟自金都嘅攝影師。Perfect match 吖。

 

註冊儀式完成,呢對新人好熱情咁多謝我地。猛話我地好比心機做嘢,帶比佢地一個難忘嘅婚禮。望住眼前呢 pair 靚仔靚女,心諗如果等我技術成熟啲、精神好啲、器材靚啲先幫你地影就好了。不過世事就係咁多遺憾,無如果。

 

第二日繼續直踩,繼續極唔情願咁起身。拖喼走人,睇地址,搭車,到達女家,祝賀說話,收利是講多謝,開喼囉部機出來,format 張卡,開工影嘢,斷片,收工。機械人式連續砌咗九日之後,心諗「卒之可以休息下!」,點知就比我發現一件驚天地泣鬼神嘅殘酷事實。當我響部機囉張 SD 卡出來,準備收好佢嘅時候,我就發現……咦?點解張卡上面寫住個日子,係尋日嘅?今日張卡呢?我即刻搏曬老命摷我個爛喼,好快就發現到屬於今日果張 SD 卡。

 

「仆街喇!尋日嗰場童話式婚禮呢?」哈哈,已經比今日嗰對新人 Overwrite 咗喇。哈哈,我 format 咗尋日錄低嘅所有嘢,眼瞓吖嗱。哈哈,所有嘢都返唔到轉頭喇。哈哈,轉行事小,點賠返個婚禮比人?我標曬冷汗,腦入面有六七個最壞打算,但係一個補救方法都無。

 

(待續)

 

上篇:012:酒樓群俠傳

 

《金都.婚攝.血淚史》連載中

Series Cover

有血有肉,賤賣青春
震撼 700 萬人嘅攝影佬成長日記

「金都,就是我們的獅子山精神」

作者:陳家富
圖片:陳家富及游永富
wesellyouthcheap@gmail.com

 

更多資訊,請留意蔓珠 FB 專頁

 

One thought on “金都.婚攝.血淚史013:張小姐(上)|陳家富

留言

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s