尋晚,我同女仔一齊睇卡塔爾對香港|柏斯迪

20160325 港足

 

我有一個朋友,她對足球幾乎一無所知,對曼聯的印象仍然停留在有碧咸坐鎮的年代,而碧咸早已掛靴數載。Today I……竟然聽到她說要看這場卡塔爾對香港的球賽,以增進足球知識,我惟有被逼應酬一下……

 

「卡塔爾好似是最勁?」咦,有做少少功課喎。

 

「卡塔爾係同組最勁,六戰全勝,已經肯定出線。今場中堅有上幾場踢得好好嘅中堅基藍馬停賽,另外陳偉豪都傷咗,所以常規中堅得番法圖斯,佢拍檔應該係羅拔圖或者羅素,兩位羅生都係第一次入選。另外中場 10 號指揮官林嘉緯擺咗後備,用黃洋、聶凌峰同羅素拍檔,希望做好防守先。」

 

「呃,我想問你講緊港隊嗎?好多西人名……」讚美得太早了。

 

「係呀,因為今場正選 11 人有 9 個係入籍兵,得葉鴻輝同李志豪係 local,前線正路嘅,麥基、保連奴打兩翼,辛祖中間接應,但把握力會較差,今場可意留意羅拔圖操刀死球(罰球/角球)。而家講卡塔爾。」

 

「吓?」

 

「卡塔爾都有唔少入籍兵,包括今次召入咗一個日本後衞,一個烏拉圭前鋒,陣中最強可以留意 3 號、8 號同 16 號另外前線有個 13 號身高 1 米 94,頭槌有威脅。另外,港足作客西亞有少少時差(所以凌晨開波),相對會蝕底,唯一少少優勢係卡塔爾晉咗級,睇吓會唔會留力/放軟手腳。首循環香港主場輸 2:3,但其實係先輸 0:3 再追兩球,可以話唔放棄,但亦可以話真正差距係唔只一球。」

 

開波!

 

「感謝主我見到了,個波喺草地中心。」

 

「兩分鐘雙方試探中。」

 

「原來咁樣叫試探,我好認真諗緊佢地做緊乜。」……

 

「暫時香港都係穩守先,前場只係擺辛祖,幾乎 10 個回防。」

 

「3 號傳中好有威脅。」

 

「其實個波踢咗上觀眾席,咁觀眾咪好慘囉。」專心啲睇波好嗎?

 

「可能會省傷人架,唔係未試過。羅拔圖中場逼搶暫時唔錯,暫時後防都係穩陣為先,組織唔到攻勢。」

 

「慢咗出腳踢中 JJ,竟然有得開波 :O,睇慢鏡以為黃洋犯規,點知吹對方!」

 

「我睇錯咗黃洋達……」自動省略廢話。

 

「3 號真係超勁,左後衞出擊力超強。」

 

「0:1,20 mins,又係 3 號,助攻畀 10 號,12 碼點空晒入波。」

 

「又係 3 號,好彩葉鴻輝封到。」

 

「葉鴻輝!!出近快封到 2 號攻門,3 同 2 兩隻閘真係好勁。」

 

「又係 3 號直射,葉鴻輝拍出,都唔知又 3 號咗幾多次。」

 

下半場!

 

「高梵換麥基,艾力士換聶凌峰,呢兩個調動好搏,換走咗個防中,加多咗個前場。」

 

「港隊中堅差啲誤會,好彩葉鴻輝接實。」

 

「香港下半場多咗主動壓迫,踢得主動但擔心體力。」

 

「高梵 chur 到波。」

 

「你聽過梵高吧,值幾多百……」終於出聲,以為佢瞓左……

 

「香港走甩冇被吹 12 碼,黃洋無意犯手球。李偉文:其實要吹……都應該係要吹嘅。」

 

「風繼續吹,不忍遠離……」你究竟係睇波定唱歌?

 

「艾力士射門,太正被門將接實。」

 

「我只顧睇門將靚仔否……冇留意佢係艾力士。」

 

「再次接實。葉鴻輝好波!」

 

「羅素剷漏,對方扭過埋葉鴻輝,可惜拗射中柱。」

 

「兩個後備都發揮到一定作用,其中高梵護球同突破都唔錯。」

 

「危險位置輸罰球。僅僅高出,應該係日本入籍兵。」

 

「乜係入籍兵?」

 

「係非本地出生,但住滿某個年期成為當地居民,符合代表隊資格,例如香港就係攞特區護照,住滿七年。」

 

「艾力士都係香港人啊咁。」

 

「Yup! We are Hong Kong!」

 

「再次係 3 號,下半場第一次威脅──呢點港隊唔錯,對方 hea 咗都係事實。」

 

「仲頂住,HK 再進取啲,用攻中換走右後衞,羅拔圖墮後踢返閘。」

 

「0:2!」

 

「咁都入到………….」

 

「傳中靚,掂到就入。」

 

「完了吧,如無意外~」場已完。

 

「港足現時同國足同分,但得失球較差,而且中國仲有一場對卡塔爾,所以基本上肯定出局,而且次名都應該唔夠其他小組次名好。除非中國大敗十幾球。」

 

「不過,要多謝港足,畀我地知道世盃夢真係有機會成真。」

 

「同埋,希望大家嘅重點唔係阻唔阻國足出線,而係我哋真係踢得好,唔係每次嘅讚美都係因為否定他者,而係正面建立本土、屬於香港嘅價值,以後繼續撐,多啲入場睇本地波啦!」

 

「呃,其實我都唔知講乜好,始終心底好想好想贏番次。」

 

「所以繼續努力,一定會贏。學鍾仔話齋:江東子弟多才俊,捲土重來未可知。」

 

We are Hong Kong!

 

相關文章

香港隊勁揪!|梓望

「Catalonia is not Spain」:足球是政治的催化劑|Manson Wong

美孚橋底搞睇波心聲|Kenny Poon

數百街坊,街頭見証香港勝利一刻|戴毅龍

【相集】山道史上最多人一夜|戴毅龍

By 街坊,For 街坊:山市街街頭播波後感|雷日楠

 

更多資訊,請留意蔓珠 FB 專頁

 

留言

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

w

連結到 %s