共創成長路,挽回了學生的生命嗎?|陳沖

20160309 共創成長路

 

其實一路想講,但係又怕被人話抽水,呢期往生嘅大學生,好多都係「成長的天空」、「共創成長路」年代嘅學生,我不禁思考呢啲計劃嘅所謂成效。

 

「成長」同「共創」都係針對當時自殺學童而創辦嘅活動,「成長」係由蔡元雲醫生提倡,我當年有幸親自聽佢喺區議會會議做演講,幾乎聲淚俱下咁表達對被忽略嘅學生嘅關愛。而「共創」由石丹理教授同中大、城大嘅人力物力,意圖承接「成長」之後,喺中學繼續有關工作。

 

我個人有參與過「成長」部分工作,主要都係帶活動,但係就曾經喺兩間中學、三個班級主責「共創」嘅活動,對「共創」感受甚深。

 

「共創」其實開宗明義係被被忽略嘅學生,希望發掘有潛藏危機嘅學生,及早介入避免出現情緒困擾,甚至係自殺嘅出現。其中一間 Band 5 學校(當時仲係五級制)用問卷形式去搵有類似傾向嘅學生,另加學校社工嘅推薦,組成約三十人嘅班底。如是者我就每個星期兩次左右入學校搞活動,長假期搞 camp、搞配對義工服務。

 

呢間學校因為搵返嚟嘅學生都有需要,部份就係專業離群搞事份子,有部份係有學習障礙嘅學生(嗰時 SEN 都係啱啱有),所以班學生好多都有好大進步,而且明顯地佢哋「被看見」!後來有部份就算無再返學、出咗嚟做嘢,但係都知道佢哋叻仔咗,有事知點做。

 

另一間學校 Band 2-3,係另一個世界。我完全感受到班學生係學校精英,好多都係學校想培養嘅人才,只得幾位係社工推薦嘅先係計劃想要既學生,無奈有啲最後都無留喺計劃之內。呢班學生而家都有聯繫,大家都好重視曾經一齊玩過、學過嘅時光。只係,「共創」嘅目的唔係做領袖培訓!當然呢批學生有我哋同學校嘅關愛成長,佢哋好多都好叻仔叻女,只係不被看見嘅學生,我哋真係好難搵得到……好多學校都係將有用資源放喺有用學生之上,咁,成個「共創成長路」社工部份嘅意義仲喺邊呢?

 

當呢班學生入咗大學之後,又不斷聽到有學自殺既新聞,我不禁問我哋曾經為佢哋做過乜呢?而有唔少自殺嘅學生仲係中學生,而家既社工同事會好傷心。佢哋又可以做啲乜呢?而我而家嘅學生,好多都掙扎求生之中,生命在不同嘅人身上,有唔同嘅意義。

 

#共創成長路 #我是社工 #人生的意義

 

相關文章

生命有何寶貴?死亡有何足惜?|神

關於自殺:不要下太簡單的結論|柏斯迪

 

更多資訊,請留意蔓珠 FB 專頁

 

One thought on “共創成長路,挽回了學生的生命嗎?|陳沖

  1. 雖然我好唔鐘意uap , path呢啲野 , 但一黎,作為社工 , 你一定知道世界上冇一個計劃係無敵 , 學你話齋 , 好多時過程中參與學生嘅進步都睇得到時 , 難道不足以感恩?一個計劃就想挽回所有生命?不如諗下點喺生命教育、其他方面做多啲丫。

    二黎 , 拉埋自殺學生講 , 其實好多野都有得講 , 社會氛圍、教育制度、家長… … 叫社工反思自己的工作或手頭上的計劃係好 , 但輪都輪唔到共創成長路啊嘛 , 抽水就係抽水 , 驚俾人話抽水 , 都係抽水。

    三黎 , 其實你篇野重點係叫學校 / 社工把好啲關 , 將啲資源真係放返喺有需要嘅學生身上 , 咁你篇文就唔好咁標題黨啦 (我唔知有冇罵錯你 , 因為有時編輯會幫你編輯過先出街 , 如果有話錯人 , 請見諒 。)

    p.s. 我只不過係潛開水嘅社工仔 , 但你篇野真係睇睇下令人突然有火 , 係嬲果隻火。

    喜歡

留言

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s