亞視當年點樣同無線打仗?|船頭尺

20160304 亞視當年點樣同無線打仗?
亞視前身麗的電視(Rediffusion Television Limited),縮寫為 RTV,至 1982 年才易名為亞洲電視。

 

曾經和一個在七、八十年代幫亞視打過工的創作人傾偈,佢有一句話我好印象深刻,呢句話亦無咩見人在網上些牙過。佢話,麗的(亞視舊名稱)和無線最唔同之處,就係鍾意走偏鋒,搵啲賊來做電視劇的主角,講賊的故事。呢個講法雖然有啲誇張,但唔係無道理。

 

《變色龍》的鄺志立,相信是年輕一代都講得出的名字,佢嗰張「我唔怕啲契弟,因為我最契弟」的改圖經常在面書流傳。咁數題材偏門、而又有代表性嘅麗的電視劇,仲有《鱷魚淚》、《大家姐》、《十大奇案》、《人在江湖》等等。呢個時期出產咁多呢類型劇集,除咗是麥當雄的班底新人事新作風外,仲有市場考慮。

 

鄺志立:「我唔怕啲契弟,因為我最契弟」《變色龍》1978-1979

 

無線開台果陣,一早霸晒啲有利位置的發射站。受發射站信號接收不良的影響,係未有公共天線呢樣野的時代,麗的電視的畫面質素一直差強人意,漸漸養成睇無線的慣性收視。為了搶觀眾,同樣拍劇,麗的嘅創作團隊就要另闢蹊徑。

 

人地無線講嘅是有錢佬的家族情仇(例如《狂潮》、《家變》),或窮小子奮發向上成為中產的故事(例如《網中人》),麗的就從販夫走卒的角度出發,展現一個屬於江湖、黑道的地下世界秩序。在這裡,壞人一樣會受到法律制裁,但佢唔係要導人向善,宣揚惡有惡報所以都係唔好做壞人的價值觀,佢只係展現行得呢條路就要有食得咸魚抵得渴的心理預備。

 

最表現到呢種態度是《大家姐》。大家姐本身就是黑社會人物,只不過講江湖道義,特別會照顧弱小。咁有人會問,70 年代有廉署,點解戲中人物有事唔搵差人而仲要找江湖人物出頭呢?我估第一,警方的良好形象仲未在短時間內建立出來;第二,戲中講到啲匪徒隨時入屋劈友,成個屋村無王管,雖然現實無咁誇,但多少反映 70 年代社會治安不佳,單靠警力無法維持。

 

《大家姐》1976
《大家姐》1976

 

《大家姐》之後,仲有《大家姐與大狂魔》,反映七十年代麗的既觀眾都幾受落。呢種撈偏門的題材可以放異彩,必須有社會特定的環境因素相配合。放諸今天,把關的電視台高層唔會容許呢種節目出街,動輒投訴的觀眾對呢種教壞細路的劇集的容忍度更近乎零。比較中間相隔 40 年的香港,你會懷疑究竟我地社會是開放咗,抑或保守咗。唔好扯咁遠,講番八十年代,亞視的主打劇早就變晒《大俠霍元甲》、《IQ成熟時》、《武則天》、《秦始皇》等等,已經循規蹈矩得多啦!

 

更多資訊,請留意蔓珠 FB 專頁

 

留言

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s