關於一帶一路的三件事|蔓珠編輯室

20160114 一帶一路三件事

 

CY 尋日提到嘅施政報告入面,竟然提到「一帶一路」呢個詞語成 42 次,究竟係咩嚟架!小編搵咗少少資料,希望幫到大家認識一帶一路(嘅危機)啦。

 

一:中美角力場

 

絲綢之路經濟帶和 21 世紀海上絲綢之路,簡稱「一帶一路」,係習總最早喺 2013 年提出嘅經濟合作概念,由中國一路向西,經過亞洲、非洲到歐洲多個國家,總共包括全球 40 億人口(好似係)。

 

點解中國要一路向西?因為向東此路不通。舊年美國、日本等 12 國簽署嘅自由貿易協定 TPP(跨太平洋夥伴關係),就排除咗中國參與。中國以亞洲基礎建設投資銀行(亞投行)作為回應,以基建融資吸引西亞等地嘅發展中國家加入,最後連英國同德國等歐洲大國都落埋水添。大吃一驚嘅美國,而家就密鑼緊鼓同歐盟商討跨大西洋貿易及投資夥伴協議(TTIP),以拉攏返歐洲各國支持。

 

唔知講緊乜?無錯,全球爭霸嘅野,我地啲蟻民識條鐵咩。

 

二:輸出過剩產能

 

中國十幾年來一直靠基建帶動經濟增長,加上地產市場過熱,近年開始出現產能過剩嘅問題。鋼鐵、水泥、煤礦、發電等工業,都由於經濟增長放緩而造成大量浪費,惟有靠亞投行刺激國外基建需求。

 

甚至連高鐵都有同樣情況,中國鐵路總公司舊年就已經拖欠承建商 2500 億國內高鐵工程費用,無辦法達到國內高鐵投資目標,惟有周圍推銷高鐵,以免成條高鐵產業鏈攬住死。起咁多基建會唔會導致另一個無底深潭出現,就不得而知喇。

 

說穿了,中國自己經濟搞唔掂,就將問題輸出去國外,延遲爆煲時間。所以,一早話咗高鐵係大白象,首先香港起緊嗰條就要停建止蝕啦!

 

三:其實同香港無咩關係(亦最好無關係)

 

早在舊年 7 月,民建聯已經上京見過官,討論一帶一路問題,民建聯仲諗住游說阿爺,喺香港設立亞投行辦事處添,咁當然係無咗下文啦。正所謂「真是荒謬,把自己看得那麼高」,阿爺都係答返佢地「要利用『一帶一路』、國家『十三五』規劃,去思考香港的定位」,即係叫你地返去自己諗掂佢,先好同阿爺講。於是尋日 CY 特登提咁多次一帶一路一帶一路,邀功都唔洗做到咁核突卦。

 

如果阿爺覺得香港幫唔到手,咁建制派就擦錯鞋啦;如果香港真係如 CY 所講,可以發揮金融業優勢,咁就仲大獲。十幾年來香港都做緊人民幣走出去嘅跳板,結果搞到香港樓價高、通漲高,民不聊生不特止,仲令中國坐大、政權穩定添。

一邊嗌「我要真普選」,一邊親手養肥香港民主最大嘅敵人,千祈,千祈,千祈,要嗌唔好,唔好,唔好!

 

更多資訊,請留意蔓珠 FB 專頁

 

留言

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s