陳澤滔,係我見過最傻嘅人!|特約轉載

20151123 陳澤滔

 

 

陳澤滔,係我見過最傻嘅人!

 

佢辭咗主題公園工程師嘅工作,走去選區議員,就算選到人工都低咗,做嘅嘢又多咗又辛苦咗。

 

佢辭咗職就日日去擺街站,晨早六點街站有,擺到凌晨一點嘅街站都有!擺到啲街坊話:咦~陳生乜又係你!

 

佢朝早去早站/訪問前永遠唔食早餐,有時下午四點先食第一餐,有時忙到一日先食一餐。結果佢瘦到人乾咁,又成日面青青。我一見到佢第一句一定係問佢食咗野未,然後佢例牌答未,我就要拉佢去食嘢。

 

佢堅持母親節同中秋節要諗 d 手工俾小朋友喺街站整。如果我幫小朋友整太多,佢會話我,叫我俾小朋友親手整。

 

佢自己一個喺功樂道由朝企到晚數小巴,仲要整份幾頁紙嘅小巴報告俾居民。

 

佢寫 d 文/報告永遠係千字文,長到 designer 排版排到頭痛,次次都要 cut 字。

 

佢做寵物公園諮詢,自己一個通宵喺度砌個 lego 模型,整到出嚟個個都話靚。

 

佢擺街站唔鐘意插旗同擺拉易拉架,佢唔鐘意人大聲講請支持2號陳澤滔。佢要人睇到佢嘅低調。

 

但可惜我無佢咁低調。

 

佢係第一個向我承諾嘅男人。佢話如果當選咗,會請我做佢助理,咁我就可以日日做我最愛嘅工作:幫老人家量血壓。我話但我唔識做 admin 野,佢話 admin 野唔使你做,我會另外請一個人做。我作為一個廢青,從來無諗過會有人想請我幫佢手,仲要係請一個唔識做 admin 野嘅人做助理。

 

喺嗰一刻,我決定咗要做你背後嘅女人,支持你。

 

佢好怕麻煩到人,你唔主動話幫佢,佢就會唔聲唔聲,乜都自己做晒。

 

佢份人好孩子氣,俾人讚一句就自吹自擂;俾人話一句就自怨自艾。成日要人氹,我地都話佢係死港女。

 

佢講說話好直接,成日得罪人多稱呼人少,又無端端就會爆(利申:俾佢爆過幾次),但大家都明白佢脾性,所以嬲佢唔落。

 

佢有好多缺點,但依然都好多人撐佢,好多人幫佢!佢就係有一種吸引力,令大家想幫佢,想支持佢。

 

今晚我哋嘅團隊為佢流下咗唔少嘅眼淚,有我女人仔嘅眼淚,都有堅強大男人嘅眼淚,但佢一滴眼淚都無喺我地面前流。佢話輸咗就係輸咗,仲笑着去同 x 仔握手,笑住話一齊去慶功,笑住咁攬住兩個喊緊嘅男人安慰佢哋。

 

一齊行落山,我忍唔住同佢講,我無得跟你啦,跟住攬住佢喺度爆喊。佢仲拍住我膊頭安慰我,仲笑住話你咁樣我女朋友會嬲架!

 

一齊食嘢佢仲好似冇事咁,但食完佢就趕住走,我見到佢對眼紅咗。

 

其實我好嬲,有好多惡毒嘅説話想鬧。但其實真係要講嘅,只有一句。

 

陳澤滔,I love u! Always.

 

利申:滔有女友,我對佢都唔是愛情嘅愛。

 

(相片攝於一日晨早街站後。每日嘅晨早街站佢都要撐呢條長命斜上去。)

 

文:Haha Manyu

 

相關文章

淡泊地革命,壯烈地耕耘:寫在《我的爸爸參選了》之後|朝雲

我是文青,我參選:西營盤張啟昕|竹子

對撼 Treegun 唔叫勇,我只係補償!漁灣區徐子見|小麗

投票日前夕感言:民間有力量才是王道|戴毅龍

區選的意義:重建政治參與的橋樑|林培元

原來政治係咁黑暗:助選團成員變成非禮犯的自白|特約轉載

有一種候選人 叫戇居|特約轉載

 

《街巷人物》區選系列

 

更多資訊,請留意蔓珠 FB 專頁

 

 

 

留言

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s