他們投票的理由|街巷人物

今屆區議會選舉,距離票站關閉還有三個多小時,他們告訴你,投票的理由。如果你還在猶疑應否投票,希望他們可以打動你。

 

street9

我姓陳,住喺黃大仙, 22 號我會去投票喎!我之前我個邊泛民主派議員,因為對市民來講民主好重要,無論如何都應該幫我地爭取多啲民主!

 

street10

我叫 Ambrose,我梗係知道22號係區議會選舉啦,我住火炭嘅。我會去投一個獨立嘅候選人。因為佢係真係土生土長係我地個社區,對呢個區有感情同埋知道發生咩事,好過嗰啲政黨空降一個人落嚟,其實根本就唔了解我哋嗰區,亦都唔會真心為我地爭取乜嘢。雖然我知原本嗰個建制派議員都連任硬,但係我點都會去投票嘅,因為一份要幫助弱勢既精神!

 

street12

我叫 Justina,住喺屯門。我知道 22 號係區議會選舉啊,我都未諗定投邊個,但係起碼唔會係建制派先啦。其實做一個好嘅區議員,最緊要係了解過嗰區居民嘅需要囉。例如我住緊嗰區咁,居民就好關注幼稚園嘅學額、交通道路、同埋休憩設施。不過個人嚟講,我就唔會要求區議員幫我地改善交通,因為香港呢個地方,交通一改善咗樓價就會勁升,住都冇得你住。

 

street19

我叫阿 Nick,住柴灣。星期日我都會去投票嘅,我嗰區有一個獨立候選人同埋一個公民黨,我會去投公民黨嗰個。因為我覺得嗰個獨立嘅太新,冇政績可言,所以好難信得過。區議員只要做好地區工作就可以啦,即係包括收集好居民既意見,同埋跟進佢地既個案。不過好可惜,其實我覺得好多區議員根本冇誠意去做好呢啲野。

 

street20

我叫 Jennifer,住屯門,富新區。我知道 22 號區議會選舉,我會去投票。我地全家人都會去投票,因為我覺得呢個係公民責任,雖然我個區嘅區議員好難投得落手。我個區總共有 6 位候選人,5 位自稱獨立候選人,1 位新民黨。基本上區議員同我嘅生活無直接影響,因為我住宿舍,好少係我區出現。就算有都唔會參與社區事務或者佢地搞既活動。

 

相反我媽就會多啲,因為佢有玩一啲街坊活動,所以同社區個連結就多啲。我對區議員嘅印象就係佢地都係改善一啲社區建設,例如爭加某巴士班次,仲有咩增設圍欄之類的東西。至於對區議員嘅期望其實無咩,除了改善居民日常生活之外,都希望區議員會留意或注意到區內有邊啲弱勢社群係需要幫助,可以比多啲支援。同埋我會諗就係社區究竟係咩,點建要有區議員,街坊居民可唔可以為社區做啲咩,我地期望既社區係點既,社區究竟有咩力量等等。最理想當然就係街坊同居民可以參與、共同建設一個屬於自己嘅社區。我希望可以喺嗰 6 位候選人入面搵到個對社會有責任,會關心弱勢社群既候選人。

 

street21

我叫 Elsa,住係太子花墟附近。我星期日一定會去投票呀,不過我仲未決定好投邊個,好似個個都唔係好識咁。希望揀到個真係聽市民意見,服務居民嘅人,唔係得個講字。呢區最需要改善嘅係衛生問題,因為太多食店。同埋太多車,成日 double parking。

 

street23

我叫 Karis,住屯門區,22 號會參與區議會選舉投票。雖然估計最終都會係建制派候選人贏,亦唔覺得區議員有好大嘅政治影響力,但我仍然會投票,將手上一票投俾民主派候選人。一方面盡公民責任,另一方面對建制派嘅工作及政治取態表達不滿。但其實我對另一位民主派候選人冇乜認識,亦見唔到佢有政綱宣傳。喺唔投建制派嘅前提下,都無其他選擇。

 

street24

我係 Kathleen,八十後打工仔兼社工學生一名。我知今個星期日係區議會選舉,嗰日雖然要返工返足全日,但幾日前我已經諗好去投票既安排喇~

 

雖然我嗰區既候選人都唔係最心水嘅,但我都覺得要去投票。

 

一方面我覺得係一種公民責任,同時亦都代表左我既一種政治參與同表態,因為我關心香港嘅社會同政治,我想要真民主、真普選。雖然同民主既目標仲有九丈咁遠,但投個票都唔做,咁仲講乜話要民主呢?

 

區議員嘅話我希望佢關心地區、包括人、動物、環境同文化,仲有當然要關心公義,最緊要係願意俾心機做。

 

street25

我叫溫婉,住屯門,知道 11 月 22 號有選擇,會去投票,因為今年終於唔再係民建聯自動當選,有人同佢對撼,夜晚經過樓下都見到個新參選人仲擺緊街站,好似好有熱誠,但問心都係覺得民建聯會當選,始終我果區太多老人家,所以對區議會無乜期望。

 

street27

我叫阿離,住大埔區,知道 11 月 22 日是區議會投票日,而我亦是選民並會於當日投票。(可以投票已經好幸福,意味著不是自動當選)

 

對區議員的期望,是讓區內居民知道他在幹什麼、把錢花在那裡。 大概是因為不久前,大埔曾發生「林村天安門」事件,涉及區議員沒有利益申報問題外,更暴露出不少居民在新聞報道前毫不知情。因此,我期望的並不是「成功爭取」,而是做到真正的諮詢工作。

 

更多《街巷人物》區選系列

 

相關文章

給你一個投票的理由|蔓珠編輯室

淡泊地革命,壯烈地耕耘:寫在《我的爸爸參選了》之後|朝雲

我是文青,我參選:西營盤張啟昕|竹子

對撼 Treegun 唔叫勇,我只係補償!漁灣區徐子見|小麗

投票日前夕感言:民間有力量才是王道|戴毅龍

區選的意義:重建政治參與的橋樑|林培元

原來政治係咁黑暗:助選團成員變成非禮犯的自白|特約轉載

有一種候選人 叫戇居|特約轉載

 

更多資訊,請留意蔓珠 FB 專頁

One thought on “他們投票的理由|街巷人物

留言

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s