金都.婚攝.血淚史 012:酒樓群俠傳|陳家富

金都 012

 

《金都.婚攝.血淚史》連載中

 

<012> 酒樓群俠傳

 

我跑嘅金都單入面十單有八單,新人都會響酒樓擺晚宴。酒樓同酒店比,有一樣好明顯優勝嘅地方,就係入面個個都識武功。

 

「阿姐!你咪當自己識隱形先得架!」飛機忍唔住放低部相機,大聲喝住衝上證婚台嘅酒樓女工。

 

飛機係一個好有 heart 嘅攝影師,幾多錢嘅單佢都會盡力做。但係拍攝唔順利嘅時候,佢會非常躁底,尤其是唔係佢問題嘅時候,佢會屌得十分大力。

 

※ ※ ※ ※ ※

 

新娘讀完誓詞,流咗兩滴好真嘅眼淚。呢個時候,另一個識輕功嘅阿姐響台下一嘢就彈咗上台,就係為咗遞紙巾比新娘。佢好似好識做咁唔企響一對新人中間,但係就選擇匿響新娘後面遞隻手上新娘塊面度!結果個台上面就有一對互望嘅新人,證婚嘅律師同埋著住鮮紅色酒樓制服嘅阿姐跪咗響度。個構圖尷尬到不得了。

 

「彈開啦!靚女!」飛機極唔客氣咁喝罵個阿姐,但大家都知酒樓阿姐係好少理的。

 

「其實呢,響我地影相佬角度,眼淚就點都係靚過紙巾嘅。」我嘗試同經理反映,希望佢幫手提醒返一班阿姐。

 

「哦,得架喇得架喇。」呢位經理好明顯又係一個太極高手。

 

「同我警告你班伙計,唔好再衝出嚟呀!」飛機唔知幾時響後面彈出嚟,怒插個經理。

 

「使唔使咁撚大聲呀,大家都係做嘢姐!」本來耍緊太極嘅經理一下子紥曬馬,準備開拖。

 

「我話!」飛機瞪大對眼,同經理 face to face。「叫班阿姐咪撚再衝!出!嚟!柒!」

 

「咁撚惡下話,叫你老細見我!」哇,打交唔啱我呢 D 和理非非,都係走先。總之有幾遠閃幾遠,扮無辜就算數。點解我做親單單都好似準備收投訴咁架?

 

※ ※ ※ ※ ※

 

March in 嗰陣,新郎同新娘拖住手行出嚟。新郎哥隻腳有好幾次唔小心踢到新娘件婚紗,行得唔係好方便。其實對我地就無乜影響,行得慢我地可以影多 D,咁新人互相扶持嘅畫面都好珍貴嘅。

 

點知,暗角又殺出一個阿姐,鬼鬼祟祟咁響新娘後面幫手抽住件婚紗行,二人行變咗三人行!飛機今次唔講嘢喇,直接衝上去扯開咗個阿姐,真係粗暴咁扯完之後隨手掟佢埋一邊。飛機響三秒內完成呢個動作後,繼續爭取時間影相。而個阿姐係撞咗落堆賓客度。說來慚愧,呢招四兩撥千斤,若干年之後我係用得純熟同狠毒過飛機嘅,有機會再講。

 

但係,之後並無阿姐或者經理走出嚟投訴,所有火藥味響一片喜慶洋洋嘅氣氛之中好似化解咗咁,大家當無事發生。飲酒嘅繼續飲酒,賭錢嘅繼續賭錢。酒樓侍應就繼續摩打手咁上菜。嗱,上菜呢班叔叔都唔嘢少,個個都係風火輪高手嚟架。咩係風火輪?咪就係酒樓果 D 圓枱囉。上完炒飯未上甜品之際,佢地已經急急腳推住一個又一個風火輪,一邊好自豪咁話:「十點半就收得工,睇下我幾 fit?」。而呢個時候,賓客係連條魚都未食完。

 

※ ※ ※ ※ ※

 

趁新人換緊衫送客,我同飛機坐響後樓梯快速扯番支煙。飛機嬲起上嚟,把口都係相當惡毒的。

 

「屌佢老味,成班新移民都唔撚識聽中文!」佢一邊 check 番自己今日影嘅相,一邊屌鬼。

 

「咁新移民做,都好過你同我老豆老母做吖…」講真,咁辛苦嘅工有幾多香港人肯制先?

 

飛機望住我,好認真咁講:「哇,原來你把口都幾賤個喎。拍得住我呀吓,有潛質有潛質!」

 

呢個時候,經理響後樓梯出糧比今日嘅一班散工,有上咗年紀嘅叔叔姐姐,亦都有搵外快嘅中學生。我睇得唔多清楚,但一張五百蚊紙係有得找的。其中一個阿姐將囉到嘅錢好小心咁放落銀包,之後竟然,竟然,瞓落張紙皮上面!佢無理會個地下有幾多煙頭幾多垃圾,就咁鋪張紙皮響後樓梯,用另一張紙皮當被冚!到底佢想瞓到幾時?瞓到聽朝再開工?

 

我一直嘲諷酒樓入面嘅人個個識功夫,但係呢一式生存之道叫咩名堂,實在唔到我隨便形容。出於攝影師嘅本能,我係想拍低佢的。但係,我相信唔會有人願意睇。而因為咁,所以我決定開始寫《金都.婚攝.血淚史》。

 

《金都.婚攝.血淚史》

有血有肉,賤賣青春
震撼700萬人嘅攝影佬成長日記

「金都,就是我們的獅子山精神」

作者:陳家富
圖片:陳家富及游永富
wesellyouthcheap@gmail.com

 

3 thoughts on “金都.婚攝.血淚史 012:酒樓群俠傳|陳家富

留言

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s