有一種教畜叫戴 SIR|吾係啊瀡

20150920有一種教畜叫戴sir

 

戴 SIR 呢個名,我相信有睇開呢啲花生文嘅人都絕對唔會陌生,而呢位作家如果真係一個教育工作者,我會稱之為教畜。因為佢一次又一次咁作假故仔引人注目,而且仲利用呢啲假故仔挑起仇恨情緒,利用呢啲故仔仲要賣埋書。本來睇呢啲故仔我都可以當下科幻小說咁睇下就算,不過最近竟然連報紙都直接引用呢啲假文做新聞,呢下真係唔出聲唔得。

 

雖然我會於下文解釋點解佢啲文係假,但都要循例講下就算。佢啲文係真都好,佢都係一條教畜。

 

作為教育工作者,我地有專業操守對學生同家長資料保密,一個學生嘅故仔被放上網,搞到過千 like 咁多人睇到不出三日就全校都會知啦。你就算上吓高登睇感情台,啲人將自己啲故仔改篇寫出嚟,好快就會有人話要相認啦。一篇搞到幾百 share ,過千 like 嘅 post 有冇可能認唔出個當事人?發呢種文嘅人,有冇諗過學生會受到咩傷害?而佢一而再再而三咁出文,仲可以出埋書咁,如果啲文係真,都唔知幾多個細路受害,為咗上位,開 page 出 post,之後仲出書仲要話咩有親筆簽名,話就話叫做分享工作細節,實際就係出賣學生利益,呢種人根本就係畜牲。

 

不過我相信,佢啲文就無乜受害者,因為十篇有九篇係假,淨番果篇係佢作大到連做咗果個人都會覺得文中嘅主角過份。

 

首先,由佢背景開始,一個九十後做中學教師,最大 90 年出世,當佢會考拔尖上大學,畢業之後唔駛讀文憑都有位俾佢教,頂盡都只可能教咗三四年書。當佢嗰間係名校咁一班開 40 個位,一年真正有接觸嘅 80 個家長,佢加加埋埋都只可能認識到 300 個家長,呢個數已經係好盡。一個老師搞家教會都無乜可能識 80 個家長,莫講話 300 個。

 

呢個老師出咗幾多篇文?要數都有排數,多到可以出書嘅話我諗一啲勁爆既故仔都起碼有十幾廿篇。一個 90 後教書教得嗰三四年書可以爆咁多單猛料,咁佢真係要個個見到嘅家長都係怪獸先得,佢遇見怪獸家長嘅頻率應該同柯南遇到殺人犯唔多,又或者超人去邊都撞到怪獸一樣咁。上至高級公務員,下至有大陸口音扮睇錯學校既家長都一應俱全,如果呢啲咁既事件可以集中曬發生喺同一個人身上佢應該可以中六合彩。

 

一個人遇到咁多奇怪事,呢個機率已經好低,已經好似買大細連開十鋪大咁。不過更加無可能既係呢個戴 SIR 仲可以喺呢個行頭生存先最至係最大既奇蹟。我就講爆啲嗰幾單為例,「公務員老豆要求有文具 LIST」,「家長叫戴 SIR 幫手剪腳甲」,「入學註冊博大霧扮入 BAND 1」;呢度每單都過千 share,幾千個 like,有啲仲要被啲報紙當真咁直接引述就賣報紙。

 

閒閒地呢啲 post 都應該會有幾十萬人睇過,而咁岩得咁橋呢啲洗晒版嘅花生文,竟然傳唔到去學生度,傳唔到去當事人度,傳唔到去佢其他同事度,又傳唔到去佢校長度咁,同睇打仗片個主角槍林彈雨有十萬個人用槍指住佢係咁射都無一粒子彈掂到佢咁,仲難過連續中十次頭獎。如果個家長可以平時咁蠻不講理,但竟然可以對被成網上熱話又咁鬼寛容,仲要個個家長都有呢一種精神錯亂,「媽呀!真係好混亂呀!」

 

如果發生啲咁大件嘅事,無可能無其他人知呢位戴 SIR 係乜傢伙,就當所有家長都好奇怪唔會識得睇 Facebook 同埋新聞,咁至少佢同事會知。佢可能話佢啲同事都係義氣仔囡唔會踢爆佢嘅,所以到依家都無事嘅。就算香港果班「囧察」咁團結,都有人肯做二五仔篤「七囧」名單出嚟啦,邊有可能無人踢爆佢呀?如果佢校長可以咁耐都發現唔到原來呢個所謂老師存在喺自己學校,日日周街派花生仲有冇可能保佢呀?

 

呢度每單事件,只要一個家長要告間學校,間學校真係會好大鑊。校長有冇可能保呢個所謂老師?根據佢自稱係教緊 BAND 1 學校,有冇校長可以接受隨時名譽掃地嘅風險先?如果係傳統名校,啲家長真係可以惡到同你講話「你哋學校個教員室係我捐嘅!」,有冇校長會因為保一個「九十後教師」同呢班家長對抗先?依家個教育界市場,一個 job post 閒閒地百幾二百封信,拆信都拆死人,大把博士碩士,大把勁有經驗,更有可能有啲被殺校嘅校長都都搵緊工,喺呢個市場無一個人係唔可以被取代嘅,有乜野理由要留呢件計時炸彈呀?呢啲 90 後年年簽合約嘅,話炒就炒架啦,理由都唔駛俾。

 

佢啲案件就算係轉述人地啲事件唔係喺佢身上發生,隨時都大把人會被炒啦!根本就無事實真確性可言。唔該呢個所謂老師你老作都作第二啲,又或者加番句本故事純屬虛構啦。

 

我個人好鍾意睇花生文,本身都有睇下佢啲科幻小說,不過我真係頂唔順佢呢啲強加一啲仇恨元素落去,佢加咗啲元素係會令一類人會有唔應該嘅印象。就算我好憎果班助紂為虐嘅公務員,又或者唔鍾意啲有啲蠻不講理嘅新移民家長(事實上呢啲家庭真係較多事件發生),但要講佢地嘅時候都應該要基於事實討論。戴 SIR 作咁大個故仔,標籤某一類人會做某一類野,係會以誤導帶來仇恨,同之前 BuzzHand 篇「阿芳綜援家庭」文搞到滿城風雨又有乜分別。

 

一個教育工作者,為咗上位,為咗銷書,為咗個人利益,要搞到咁多人受影響,呢種人,我會稱之為「教畜」。

 

綜援婦月入1.3萬「新聞」造假|壹週Plus

留言

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s