金都.婚攝.血淚史 010:「後生仔,做嘢姐」(上)|陳家富

20150914 金都 010

 

《金都.婚攝.血淚史》連載中

 

<010> 「後生仔,做嘢姐」(上)

 

老細響金都商場開業果陣,已經好醒咁搶咗頭啖湯,即刻開咗全港頭幾間嘅婚禮攝影專門店。九十年代,「攝影服務」呢個概念仲未好流行,老細決定大搞。佢響全港招兵買馬,卒之比佢響街市搵到一個斬緊豬肉嘅後生仔,可能係佢全身上下散發住攝影天份啦,於是就叫咗佢去幫手影相。一幫就幫到而家四五十歲,係名副其實嘅老師傅。

 

公司成班後生叫佢做校長,因為佢出名多訓話,尤其鐘意指點後輩。而今日我就係要同校長一齊開工。連開左幾日工嘅我已經攰到抽筋,而今日竟然要搭船入梅窩。梗係想響架船上面瞓多一陣啦,但係校長就係咁撩我講嘢。

 

校長:「後生仔,你知唔知我入行果陣呀,八舊水任做直踩到尾架,而家有三粒鐘落場,係我帶頭同老細反映架!」

 

我係唔識 social 架喇,不過點都要搵少少嘢講:「勁喎…咁你做左咁多年而家咪好高人工?」

 

校長無理我的提問,繼續訓話:「我連開左五日都未嗌攰,後生仔唔係咁渣呀嘛。有精神利是先醒神呀!」

 

又係利是。

 

校長:「後生仔,一陣等我帶(個流程)啦,個客都麻煩架,九點半鐘要出門,乜都要快!」

 

我:「九點半出門佢 call 我地八點半?唔影相都趕唔切啦?」

 

校長:「氣,後生仔都唔用吓個腦嘅,十個客九個聽到八點半前要比的士錢都唔制架啦,梅窩喎!比你都會啦!」

 

隱約見到前面背住我地個 pair 乘客都稍微點點頭表示贊成,唔係啩?輯相一世人一次,影一粒鐘?

 

校長見到我個 O 咀樣,十分鎮定:「都係咁影架啦,後生仔,定 D 嚟。」

 

佢係咪諗住每句說話都要加「後生仔」三隻字?

 

去到女家門口,校長好大力咁拍門,果種震撼令我聯想緊佢以前斬豬肉都應該係十分帶勁。「唔使咁用力吖嘛?」

 

「你識咩吖?聽唔到入面好混亂咩?唔大聲 D 佢地聽唔到架!!記住,今日等我帶!喂…你叫咩名話?」

 

一開門入去,校長第一時間用街市佬把聲同大家打招呼:「恭喜曬!外父外母,利利是是呀!」

 

本來非常混亂嘅客廳聽到校長一句即刻全場靜曬,原來「有精神利是會醒神」係咁解!當然,我已經唔係好敢直望屋入面嘅人有咩反應。但係校長好少理,即刻搶左 D 金器茶杯係咁影。佢一邊影一邊大聲催促化妝師:「新娘仲未得呀?吉時過喇!」入咗去新娘房打招呼嘅我想搵窿捐。

 

「新娘子唔好側膊,伸直!再嚟!唉呀又縮埋唔好縮埋!」呢一刻新娘個笑容應該同我個笑容係一樣樣嘅。忽然校長拉住我,指定我企響佢霸左好耐嘅四正位。

 

校長對住新娘同所有姊妹宣佈:「嗱呢個就係影花絮個師傅。你地有無口號呀?」

 

口號?而家 D「後生仔」,包括我,唔識咩口號架喎。大家都 R 曬頭,等校長繼續指示。

 

校長:「氣!口號都無,唔緊要!咁你地對住個鏡頭,講下今日想要幾多開門利是啦!」

 

姊妹靜曬。校長無放棄過:「就九千九百九十九啦,一齊嗌好唔好?一,二,三…」我 feel 到自己標緊冷汗,應該發緊病。幾多利是都補唔番嗰隻。而新娘姊妹 D 面口嗰隻灰色,應該點 tune 隻色溫都 tune 唔返正常咯。

 

卒之完左女家嘅拍攝,我稍為鬆一口氣。點知落到樓準備上花車,校長又有新搞作。

 

「嗱呢個後生仔就拍花絮,今晚會播嘅!一齊對住鏡頭講八隻字!『開開心心永結同心』,嚟喇!?一,二,三…」

 

唔使問,班兄弟姊妹梗係靜 Q 曬啦。柒咗成個朝早,無理由不停捱打。我決定豁出去,最多柒埋一份啫:「當自己時昌迷你倉個鬼佬咁嗌就得架喇,唔齊唔收貨呀!嚟喇好無?」搞完個爛 gag 之後,我就進入咗飛行模式,準備潛水。

 

點知,班兄弟姊妹竟然有笑!太好喇!原來講笑話係個咁大嘅賭博!雖然唔知自己做緊乜,但係我淨係想快快手影完落場咋,感謝主!

 

(待續)

 

《金都.婚攝.血淚史》

有血有肉,賤賣青春
震撼700萬人嘅攝影佬成長日記

「金都,就是我們的獅子山精神」

作者:陳家富
圖片:陳家富及游永富
wesellyouthcheap@gmail.com

留言

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s