金都.婚攝.血淚史 009:土地是不是問題|陳家富

20150907 金都009 圖

 

《金都.婚攝.血淚史》連載中

 

做公司派嘅客人,係當日先會知道所有嘢。所以攝影師一入到屋就會周圍搵線索,尤其是響金都操出嚟嘅師傅。響講完「早晨」到「等我擺低個喼先」呢十秒,已經要知道今日嘅作戰方向。

 

我地會一邊開喼囉機,一邊開番個作戰會議。

 

「危機四伏。」賤 Man 神色非常凝重。

「做咩呀?利是又炒左粉?」慘,我開始比佢地同化。

「你當我識甩錢咩?」

「新娘大左肚?姊妹好八婆?化妝手腳好慢?開估啦!」我道行未夠,睇唔穿玄機響邊。

「呢度,係一個二至四人公屋單位,今日有六個兄弟六個姊妹…」

「吓?應該頂得住卦…」我開始識驚。

「同埋十八 pair 飲茶嘅組合…」

 

唔係卦?話口未完,有十四五個親戚類物體大喝一嘢「哇,今日真係高興乜乜乜呀」就浩浩蕩蕩行左入呢個三百尺嘅單位,同時房入面四個姊妹已經化好曬妝出埋黎嘻嘻哈哈玩自拍。我個喼一嘢比人當波踢左出走廊,唔係辦法!Do something!

 

賤 Man 馬上使出攝影師同防暴警察都必學嘅「假爆 seed」,大喝一聲就將 D 親戚推曬出屋外面。同時好粗暴咁指揮姊妹無咩事就唔好行出個廚房,有咩就響入面搞。呢下功夫真係要學!

 

通常響室內影相熱點都係窗邊,貪佢夠多自然光射入黎丫嘛。但係大家都知香港嘅住宅,果隻窗附近係幾實用架啦,胸圍底衫褲電視機大量唔等使雜物都係塞響窗邊架嘛。賤 Man 九秒九將左手嘅底衫褲同右手嘅座地風扇掟左入廚房之後就開始影,勁!佢尚且可以打到支燈最爆,遮曬幅牆嘅核突嘢。但我拍 video 真係無得避,好似拍緊窮富翁大作戰咁呀,陰功。
姊妹問:「師傅,一陣我地要 D 兄弟跳 Gangnam style 呀,響邊度跳好呀?」

賤 Man 望一望個廳,擺出一個 O 咀樣。

 

姊妹繼續:「仲有掌上壓呀呼拉圈呀做下 yoga 咁囉。班兄弟好細粒架咋,玩謝佢呵呵呵。」
王祖男咁嘅 size 入到呢間屋都變搬屋 D 大隻佬啦,仲要半打咁多添!

 

「想玩兄弟定玩我地姐?」最後賤 Man 帶我地出左走廊,陪我地玩遊戲嘅仲有電梯附近出出入入嘅人流同埋垃圾桶。日後,我先發現呢個咁悲慘嘅安排係經常出現。

 

我心諗,今日又影唔到好嘢喇。兄弟玩得幾 high 又好,接新娘果陣幾咁 sweet 都好,當咩角度影落去都穿崩嘅時候,D 嘢點會得吖。敬茶時間又係大鑊,親戚s 一定要睇到外父外母飲茶,逼曬入間屋一齊熱鬧。個廳要比兩個人跪同兩個人坐已經勉強到爆,前面唔夠位影時後面就成堆人推推貢,搞到非常扯火。

 

賤 Man 作為多年死黨,佢知我就嚟要爆真 seed:「企正中間影曬四個人算啦,唔好走嚟走去囉大頭 close up 喇。」

 

我問:「吓,分唔到鏡喎…」我知,好多時我嘅堅持講出嚟係有 D 傻豬。

 

賤 Man 其實都唔好得我幾多,佢支鏡甚至無我咁 wide。佢拗到條腰就斷就斷,成個人同後面個親戚痴到實一實先夠位影。佢用最後一口氣答我:「屌你!都要睇餸食飯架!比間劏房你都要有貨交架!」

 

我又比賤 Man 醒左一嘢。呢嘢仲要相當正面,正面得來相當悲哀。如果我影得掂香港 D 公屋,係咪即係影得掂全世界?又好似係架喎!我即刻嘗試響僅有嘅空間擠出少少角度等件事唔好太 standard。新娘子有少少雙下巴,不宜低炒,外父同新郎哥個頭頂非常茂盛,好!企到高一高炒番落去都 OK!

 

呢一剎那,竟然閃過一絲痛快,一絲成功感。

 

曾經我夢想做一個導演,要導到一條自己滿意嘅片先會滿足。而家,響炒左千千百百個 shot 之後,有一個半個 shot 成功解決問題,我開心到彈起。到底呢 D 係叫知足定墜落?

 

《金都.婚攝.血淚史》連載中

有血有肉,賤賣青春
震撼700萬人嘅攝影佬成長日記

「金都,就是我們的獅子山精神」

作者:陳家富
圖片:陳家富及游永富
wesellyouthcheap@gmail.com

 

One thought on “金都.婚攝.血淚史 009:土地是不是問題|陳家富

留言

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s