金都.婚攝.血淚史 008:指定師傅加五舊|陳家富

20150831 金都008 圖

 

《金都.婚攝.血淚史》連載中

 

<008> 指定師傅加五舊

 

香港人大多數都好友善嘅,所以佢地希望攝影師友善啲,係正常過正常。小弟試過接order,張單上面備註「師傅要有笑容,牙要白,要陽光」。收八舊水要有牙膏廣告代言人咁嘅條件,我當然第一時間抗議啦。

 

我:「我邊忽陽光棚牙邊忽白呀,有無客要求毒男樣長短腳呀,我同佢換啦!」

 

老細:「嗰日咁旺點換人呀,你慌佢到時望你咩!」

 

我:「又係你驚收投訴!嗱!收投訴唔關我事呀!」

 

老細:「Phoebe 編單!問佢啦!」

 

我地叫Phoebe 做 P 姐,又係老細的親戚。一名中女,可以身兼 sales 化妝錄影多個 post,神奇女俠咁款。大家都話公司入面寧願得罪老細都唔好得罪佢。

 

P 姐永遠都係一號營業笑容咁同人講嘢,對住我都唔例外:「哎啊~傻仔唔使擔心喎,啲客落單嗰陣梗係有咩諗到都講架啦,到當日佢地忙到甩碌就咩都唔記得架喇,哈哈哈哈~」佢用朱咪咪式的笑聲使走左我,果然係 top sales。

 

後來我又見過不同的客戶要求,「唔好講粗口」、「唔要樣衰」、「普通話流利」同「有肌肉」等等,都慢慢 who fucking cares 了。反正老細都收慣投訴,做好本份就算了。

 

P 姐最煞食的招數係打蛇隨棍上,宣傳單張上面無寫清楚的事項,都有辦法變成一個你同我諗都諗唔到嘅收費項目。例如「電影感加五百」。我係客人都真係唔多識揀,「咁平嘅電影感,又好似真係幾抵喎!咁即係有幾電影呢?」。仲有「全高清加五百」、「指定師傅加五百」等等聽講都係 P 姐響業界創的先河。

 

我好天真咁問 P 姐:「公司派比我地啲機唔係全部 Full HD 咩?有得唔係全高清架?」

 

P姐:「唔係架,唔加full frame錢,叫啲師傅crop細番D相囉!你記住個客唔加錢,唔好拍 1080 呀,拍 720 好喇!」

 

有一次,因為比老細炳所以留左喺鋪頭,我見識到 P 姐點 sell 客。

 

客人:「電影感即係點呀?」

 

P姐:「哇犀利喇,師傅有路軌,有穩定器!跟~~~住你行入教堂,仲有音樂襯底,好感人架!」

 

P姐吹到果條無乜特別嘅片全行最靚咁滯,好似得我地先出到咁嘅驚世傑作咁款。大姐,你知唔知我地班師傅咩料子呀?

 

P姐繼續車大炮戰術:「呢個師傅叫 Pierre 呀,外國學完攝影返嚟,呢度呀呢啲呀…都係佢影架。」

 

公司大部份放出來的 sample 都係 Pierre 影的,三四年前真係有過呢個師傅架,老細話。

 

客人依依哦哦左一大輪:「就要佢幫我地影啦,得唔得呀?」

 

P 姐露出得米嘅笑容:「嗰日旺日黎架喎,指定師傅要加五百,無問題?你地都要埋 Full frame 同全高清架啦,唔好浪費咁勁嘅師傅呀 blablabla…… Full frame 張相會大啲架 blablabla…」

 

P 姐又搞掂左一對客人,六千幾銀嘅 1P1V 套餐講兩講變左九千幾蚊。過左一陣,P姐走埋黎搣我面豬登,笑容滿面。

 

P 姐:「富仔呀,頭先果個客比你啦,我叫左佢地比多啲利是架喇!連埋 OT 都差唔多出雙糧喇,肥仔啦你!」講完又搣多我兩嘢。

 

我:「哦,多謝 P 姐。」

 

P 姐:「咁你果日呢,記住記住,同人講你叫 Pierre 喇喎。呵呵呵呵。」

 

我梗係當堂O曬咀啦,即刻又想同老細抗議喇。

 

但老細竟然氣定神閒,一副「好出奇呀?」嘅樣望住我:「個客問你叫咩名先算啦!又唔使提自己叫咩名嘅係咪先?最緊要拍檔唔好叫錯姐!」

 

開工當日,發現又係拍住賤 Man。我好想伏響佢寬闊的膊頭,哭訴我嘅冤屈。點解我唔可以堂堂正正咁做番自己?

 

「Hi,我今日叫 Pierre,唔好叫錯。」

 

賤 Man 少少反應都無,同老細個「好出奇呀?」樣一模一樣。唔通我真係咁大驚小怪?

 

「我今日叫 Phoebe 呀,係咪精神先!」

 

《金都.婚攝.血淚史》

 

有血有肉,賤賣青春
震撼700萬人嘅攝影佬成長日記

「金都,就是我們的獅子山精神」

作者:陳家富
圖片:陳家富及游永富
wesellyouthcheap@gmail.com

 

One thought on “金都.婚攝.血淚史 008:指定師傅加五舊|陳家富

留言

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s