金都.婚攝.血淚史 007:攝影師的情慾禁區|陳家富

作者:陳家富 圖片:陳家富及游永富 wesellyouthcheap@gmail.com
作者:陳家富 圖片:陳家富及游永富 wesellyouthcheap@gmail.com

 

《金都.婚攝.血淚史》連載中

 

<007> 攝影師的情慾禁區

 

朋友,你寂寞嗎?講個故仔你聽好唔好?

 

從前,有個年青人無端端入行做一個婚禮攝影師。佢二十五歲,血氣方剛,無女。他好想有。

 

呢份工帶比佢嘅同事,只有不停輪流轉嘅麻甩佬拍檔,同埋化妝 Sales 一手包辦嘅師奶;呢份工帶比佢嘅生活…… Sorry,無生活。當佢由朝早八點左右做,做做做到夜晚十一點,返到屋企已經攰到仆街,係無時間 Yo 女的。所以,佢相當空虛,相當寂寞相當凍。佢開始想向自己班客人埋手,睇下有無對象啱 feel。唔好誤會,他只係瞄準果班年青貌美,玩兄弟果陣如狼似虎嘅姊妹姐,唔敢搞新娘嘅。

 

年青人個樣非常兇狠,笑容都相當趕客。而偏偏佢班同事之中,大部分都係情場聖手。其中要數肥龍溝女最進取而招式最狠辣。肥龍三十幾歲,充滿自信,談吐幽默。「溝通 D 女都係工作重要嘅一部份」係佢嘅座右銘。年青人當然想向肥龍拜師學藝。

 

肥龍自稱把口浪過油,個個都聽到出曬水。年青人雖然唔知咩叫出曬水,但係都聽到出曬水。年青人奉肥龍做佢第一個師傅。每次開工,肥龍影靚姊妹的時間,分分鐘多過影一對新人添。因為「點綴個婚禮嘅綠葉都好緊要喎。帶手花,捧茶杯,必影架喎!」。

 

年青人覺得好有道理,更加尊敬肥龍。只不過佢錄影果陣,成日都影到肥龍響姊妹旁邊,露出猥瑣的笑容。所以肥龍溝女英姿往往都會送埋比個客。反正公司都喜歡「送」相簿、送成長片段、送派相、送化妝…所以客人對贈品應該都很受落的。

 

某日,出現左一個模特兒般美艷的姊妹 A。肥龍當然眼明手快,乜嘢金器茶壺,乜嘢遊戲道具佈置裙褂,連新娘化妝過程同埋外父外母都唔理喇。佢馬上捉住模特 A 隻手索兩索,再求其捉多兩個陪襯 B 同 C 一齊埋窗口。埋窗口做乜?梗係影相啦,影果啲所謂唯美嘅「姊妹預備圖」。噢,原來「姊妹預備」對一對新人嘅婚禮係咁重要的,年青人心諗第日新人睇番今日啲相一定好感動喇。

 

但係模特 A 係個老江湖,佢使出「港女西面」之後便冷淡離開,匿入廚房準備用具了。「喂,靚姊妹,未影完喎,咁心急呀~」呢句說話比年輕人不慎錄低埋。佢猶豫緊好唔好刪除嘅時候,姊妹D出現,向年青人遞上一包檸檬茶。「師傅,今日辛苦曬喇。」

 

呢個含蓄得來帶體貼,大喜日子都只係略施脂粉嘅少女,就好似一堆鬼妹之中混入一個台妹一樣,寧舍脫俗。年青人戀愛了。他一邊照常做嘢,一邊諗緊點樣識呢個鄰家女孩。

 

但係肥龍貴為婚攝界頭號情聖,當然唔會放過姊妹 D。佢又使出一式擒拿手,捉住姊妹 D 示範「咩姿勢幫新娘著褂影得你最索」。出門開遮果陣,親切貼身教她開遮嘅「黃金角度」…此情此景,年青人全部拍低曬。畫面入面嘅少女係幾咁楚楚可憐,而肥龍係幾咁咸濕。年青人非常無奈,但係本著「讓領導先上」的原則,他唯有乖乖放棄。

 

點知,姊妹 D 竟然拖住男友出席晚宴。見到姊妹 D 甜蜜幸福嘅樣子,年青人心碎了。他內心吶喊,「點解要請我飲檸茶!點解佢條仔咁樣衰!」。大受打擊嘅佢偷偷望下肥龍有咩反應,點知肥龍已經轉向低幾班嘅陪襯 B 同 C 埋手了。「響邊度跌倒就響邊度起番身」,年青人付出自己的感情,上了深刻的一課。

 

「喂,影我地咁多相做咩呀,曬唔曬返比我先?」,B和C叫得非常八婆。

 

「我 Whatsapp 返張相比你囉!比你電話我啦!」肥龍好冷靜咁呷一啖橙汁。

 

「唓,我叫新娘比返我囉!」姊妹們竟然扁咀,嚇死人。

 

「獨家架,新人都無架,想要咪問我囉!」講都未夠,肥龍仲要整個梁朝偉嘅眼神。

 

「咦~~靚仔~~~~」肥龍一邊同姊妹交換電話,一邊對年青人露出勝利者的表情。

 

年青人認輸了,原來女是這樣溝的。欲擒故縱,誰擒誰縱,他都無眼睇喇。他只好匿埋入後樓梯煲煙,讓眼淚在心裏流。

 

第二日,年青人又收到老闆電話:「喂!肥龍尋日係咪又溝女呀!成班姊妹一齊投訴佢喎!」

 

老闆繼續發炮:「新人話佢地好似無乜點影過相喎,屈我地賠錢喎!點搞呀你話而家!」

 

老闆結案陳詞:「溝到咪叻囉,溝唔到都算仲要收投訴咪柒囉!下次你叫佢檢點啦!」

 

年青人忍無可忍了:「下次?下次唔好叫我 part 佢喇!D 女比佢溝曬啦!」

 

女人變臉真係快過打針,年青人決定不再同女仔玩了。

 

完。

 

頭盔 P.S. 信我,呢個年青人絕對唔係我。個故仔都係假的,一定係。大佬比次機會吖,行家比次機會吖,大佬比次機會吖…

 

《金都.婚攝.血淚史》連載中

 

《金都.婚攝.血淚史》

有血有肉,賤賣青春

震撼700萬人嘅攝影佬成長日記

「金都,就是我們的獅子山精神」

作者:陳家富
圖片:陳家富及游永富
wesellyouthcheap@gmail.com

留言

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

w

連結到 %s