金都.婚攝.血淚史 003:始終都有第一次|陳家富

003-我在金都的第一次

《金都.婚攝.血淚史》

有血有肉,賤賣青春
震撼700萬人嘅攝影佬成長日記

「金都,就是我們的獅子山精神」

作者:陳家富
圖片:陳家富及游永富

《金都.婚攝.血淚史》連載中

 

003 <始終都有第一次>

 

今日係小弟正式投身婚攝界的一日,我嚴陣以待。前一晚我請教死黨賤 Man,有乜野要注意。

 

「如果新人係型男索女,就比 D 心機影,唔係就留力啦,漫漫長路呀!」

 

Fine。開工。

 

派彩時刻,新郎 Mark 哥高大威猛,有型有款,似足我偶像周潤發!處男下海得到呀 Mark 做我嘅 Model,個天待我不薄。覆磅作實,新娘 Jude 都係靚女一名!俊男美女放在一起寧舍養眼無得傾,賤 Man 你真係唔好彩。

 

「閉路電視」手法絕對砌唔出一條靚片,一定要「做 shot」。做 shot 不同做假,影相要擺 pose,影片當然都要設計少少動作啦。我決定先拍一個行內叫「起步」的 shot,個個師傅都一定拍,但點樣拍才是技術同熱誠的分別嘛。

 

「Mark 哥,你數三聲就向前行,好有自信咁行得架喇。兄弟響後面一字排開,KEEP 住 CHOK 樣!」

 

一邊指揮著 Mark 哥走位,一邊兼顧埋鏡頭的運動,搵番做學生拍短片做導演的感覺,嘻嘻。

 

開工前我已經上網參考左好多靚的相同影片,睇下有咩 pose 會靚,臨場再加自己的想法,希望第一條片可以省靚自己招牌啦。同時,影到身水身汗的我,無忘記老細講過要有「無論條片係點,都方便收尾」的 ending。

 

我打電話問:「老細,呢度無得 BBQ 喎,叫 D 新人同兄弟姊妹一齊嗌出動好唔好呀?」

 

老細權威的說:「叫新人對住鏡頭揮手講拜拜咪得囉!做人轉彎丫嘛!」

 

夜晚,緊張時刻。坐滿廿五圍的酒店廳,準備好播片用的螢光幕。我第一個作品出街喇!

 

全場燈光漸暗…

 

音樂響起,老細每次都係果隻歌…

 

咦…

 

乜我隻手有咁震嘅咩?做咩唔剪走佢?

 

「Mark 哥,你數三聲就向前行,好有自信咁行得架喇…KEEP 住 CHOK 樣!」…連我把聲都清楚入埋!

 

「take 2 嚟多個!」「Jude,笑勁 D,係啦!OK!」

 

呢隻唔係叫「剪」片,係「放」片!

 

一模一樣的鏡頭,出現兩次、三次…

 

Mark 哥愛的宣言,五分鐘足本播曬,我仲聽到自己個鼻索索聲…

 

配合音樂的剪接,影片節奏,講故事的手法,通通唔使諗。望就望現場所有人都係生番,最好係見到螢幕有火車埋嚟走都走唔切果隻。

 

但係現場粒聲無出。佢地係專心睇片定係食緊翅,已經無眼睇。因為片播到一半,我已經匿咗落枱底,默默等待「拜拜」呢句。呢個時候攝影同事落埋嚟枱底陪我,相當唔話得。

 

「拿,下次識做,講完野先好開機,哈哈哈哈…」黑暗中,我分唔到佢係恥笑定苦笑。

 

無聽到笑聲,無聽到掌聲。我第一條片播完了。剩下來的晚宴,我唔敢望任何一對眼,連部Cam都唔想囉出黎。

 

雖然只得八舊水人工,但係我毅然決定飛的過海返屋企。被強姦的受害人當然係想盡快遠離案發現場架啦。的士上,收音機傳來一首,由周潤發主唱的電影主題曲…

 

「人在風暴中 無奈的打轉   全為貪順風 沒作主挑選

如今逆風 豪邁的奔遠   曾熱的面孔 漸缺少溫暖

嘿喲 嘿喲 飛砂風中轉   嘿喲 嘿喲 風吹我吹不斷」

 

我真係喊左出嚟,講大話的話天打雷劈不得好死。

留言

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

w

連結到 %s