金都.婚攝.血淚史 002:「錄影緊」與「電影感」|陳家富

11815942_10152902333256755_800883740_n

 

《金都.婚攝.血淚史》

有血有肉,賤賣青春

震撼700萬人嘅攝影佬成長日記

 

「金都,就是我們的獅子山精神」

 

作者:陳家富

圖片:陳家富及游永富

《金都.婚攝.血淚史》連載中

 

002 <「錄影緊」與「電影感」>

 

大部份晚宴都有一樣東西叫做「早拍晚播」。將朝早接新娘的片段,響晏晝時間剪剪剪剪剪,夜晚就播出黎,長度多數係一隻歌幾分鐘咁啦。去過飲嘅朋友都知係咩事架喇。

 

我見到公司宣傳單張寫「運用電影分鏡技術,製作高清精華片段」,睇落係精神嘅,聽埋老細教我點拍仲精神:
「有乜野就企定定拍,唔好撚咁多鏡!」

 

「哦。」下,企定定仲點分鏡呀老細。定係你個分鏡唔同我個分鏡?

 

「我要比番條全紀錄比個客架,一忽忽想剪死我咩?」

 

「係嘅。」

 

老細見我有猶豫,馬上展示佢婚攝界廿五年經驗嘅氣場出黎。即場開機表演比我睇啦。哇,不得了,老細只係憑個縮圖(Thumbnail)就知道每個shot拍左D乜野!哇哇,原來係唔使聽聲音去剪片添,順次序放曬落去,總之錄影師影左乜野,就順序播返出黎!哇哇哇,隻背景音樂播曬喇,條片仲去緊,點算?由頭再播過,勁呀!條片完左隻歌仲未完點算?即刻cut囉!大刀闊斧,做大事就係要不拘小節!

 

「拿,你見到呢兩個shot個thumbnail一樣既,即係個shot重複左囉,掉左佢…得閒就加返兩個dissolve比佢,好接d呀你明唔明呀,我已經熟曬手架喇乜乜乜,唔使諗架乜乜乜…千祈唔好play個shot睇下有咩睇,嘥時間架乜乜乜…」

 

老細一邊神速剪片,把口一邊仲可以同我訓話,尊敬!

 

「梗係啦,大旺日我地接十幾單job架,一個晏晝要剪曬就梗係要快啦!快!快!快!」
老細越講越興奮。說時遲那時快,已經開始燒碟。佢望下個鐘點點頭,睇黎好滿意今日既表現。

 

「廿三分鐘,OK啦!」

 

老細越睇越似F1賽事果D修車團隊,專業自信有效率。婚攝界真係博大精深,充滿學問啊,尊敬度就黎爆標了。
「老細,你睇都唔睇下D SHOT。如果手震,或者個shot好長好悶,播出黎咪唔…係咁好睇囉?」

 

「咁呢d係影果個人的問題啦,攝影師手震係咪要檢討先,見悶就即刻CUT機啦!」

 

啱,睇黎要盡快學識特異功能喇,唔係點知邊一秒發生有趣嘅事呢。

 

「但係,影相既影得唔靚都會delete啦…」

 

「你知唔知客人要乜野?見唔見我掟曬D兄弟玩遊戲落條片度?有野睇有野笑,就係咁簡單,你睇下獎門人好唔好笑先?我就覺得好好笑喇!哈哈哈哈哈哈!」老細發出招牌的豪邁笑聲。

 

的確響201x年,我地真係仲等緊獎門人重播又重播噃。響茶餐廳食飯,大家望到實個電視機又真係笑到拍曬枱架喎。我老細對市場超然嘅洞悉力,令我又敬佩多佢幾分,好想即刻就幫佢賣命!

 

不過,說好的電影感呢?

 

「咁就靠你喇!」

=======

上集: 金都.婚攝.血淚史 001:開工利是  https://manjuhk.com/2015/08/01/goldenplaza001/

留言

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s