金都.婚攝.血淚史 001:開工利是

《金都‧婚攝‧血淚史》

 

000 專欄介紹

 

有血有肉,賤賣青春

震撼700萬人嘅攝影佬成長日記

 

「金都,就是我們的獅子山精神」

 

作者:陳家富

圖片:陳家富及游永富

wesellyouthcheap@gmail.com

 

001 <開工利是>

 

001-開工利是

 

小弟Day 1響金都做攝影助手的時候,學到一樣好重要既野。

 

我人生第一封影wedding既開工利是係黎自外母,猶記得老人家係一支箭響廚房衝出黎同我地講:「師傅,利利是是!」 我亦都好記得死黨賤Man以一個我從未見過既斯文有禮姿態去接過果兩封利是,不停講多謝。

 

新娘化好妝之後,同樣好有禮貌咁比左兩封開工大利是我地,上左門廿分鐘,我地就一人收到四封利是。 影左少少女家的花絮照片同影片後,我地就按正常流程落樓下,拍少少新郎哥的準備過程喇。

 

就響lift門閂埋唔夠半秒,賤Man二話不說,拆開四封利是即場點算!頭先果個溫文有禮既佢果然係假象。

 

賤Man如是說:「二十…二十….挑…新人都係得五十…」 對開工利是仲未有概念既我,唔知講咩好。

 

「…….少呀…?」

 

「梗係少啦老味!你幾錢人工呀?」 忽然間,五雷轟頂。

 

賤Man繼續:「佢識做時我識做既姐,九秒九咁衝出黎封廿蚊托呀!」 又好似有道理。

 

「今日爽D手早D走啦,舊幾水夠搭的士定買煙呀?」

 

我內心既道德撚開腔了:「下…好似唔係幾好wo,有得做唔做好D?」

 

賤Man:「拿,呢個客比十蚊利是你,果個客比五舊水利是你,你係咪交一樣既貨先?」

 

係喎!你又啱喎!

 

「客人既心態,決定攝影師既境界丫嘛。」 由六樓到地面既十五秒,賤Man就同我上左人生中好寶貴既一課。 於是,我的第一次現場觀摩,就係學習點樣交行貨。影到就算,絕對唔會做多比個客人。

 

直至影到返男家。

 

老爺奶奶無外父外母咁熱情,但係都比左兩封利是我地。

 

食飯時間,我地兩個縮埋一邊煲煙。賤Man小曬老母,內容多數係圍繞今日班姊妹有幾串同幾咁唔開胃。 我手痕拆開老爺奶奶的開工利是,發現裏面竟然係紅色既。

 

我:「哇,一舊水!」

賤Man:「咦咦。」

我:「唔係喎,兩張喎,兩封咪成四舊?」

賤Man:「咦咦咦咦咦咦咦咦咦咦咦咦!」

 

於是,下半場,即係晚宴,我見到賤Man禽高禽低唔在講,唔知響邊度飛多三四支閃光燈出來,健步如飛咁樣開工。呢頭響台前影緊合照,果頭三十三圍揮手,佢又秒速撲埋去替親戚們影造形照了。當然,佢主要係追住老爺奶奶同埋佢D親戚黎影。

 

收工了,送完客少少醉的新郎哥走埋黎同我地講:「師傅,執靚D相呀,唔該!」又比左一封利是我地。原來夜晚都有利是收?

 

於是賤Man又同我上堂:「挑,相又唔係我地執。想D相靚就開工前比啦,影相衝線派埋彩先補飛有春用咩?」

 

果一刻我先明白:作為一個賤價既攝影師,真係相當非常十分重視果封利是。佢唔係貼士唔係意頭,係人工。隨時可以變雙糧,三糧。你比少D,我就hea做,你比多D,我就有心機做。紅紙入面的其實同賄賂有咩分別?如果現場有ICAC的朋友,睇到賤Man全日既工作態度,九成九的左佢返去協助調查了。

 

「你估封利是幾千萬咩,查我?忽忽地!」

 

(待續)
==========
下集:《金都.婚攝.血淚史》002:「錄影緊」與「電影感」https://manjuhk.com/2015/08/07/goldenplaza002/

4 thoughts on “金都.婚攝.血淚史 001:開工利是

  1. 新人都比晒錢, d 親戚利事都係心意姐, 老人家點知" 應該" 比幾多? 竟然因為o甘而hea 做影響新人重視既日子, 你覺唔覺得對新人好無辜 ?? o甘你不如一開始打晒落個攝影package price 度啦 !
    大部份d 攝影佬都係o甘冇無良架?!
    同埋, 其實新人有比同樣攝影費架喎……市價冇萬幾都幾千啦, 就算比公司抽佣, 分到個數都唔會少過封利事掛 ? 點解講到封利事係成份人工o甘??

    喜歡

  2. 樓上唔明個重點 ! 個重點係, 利是唔係明碼實價架wo , 你一開始agree 左個價 , 一分錢一分價我理解呀, 好合理.
    但老人家俾既利事, 新人控制唔到, 而且佢地真係唔知咩 “市價" “公價" 架wo !

    喜歡

  3. 咁好正常姐,講到人大奸大惡咁
    拿,呢個客比十蚊利是你,果個客比五舊水利是你,你係咪交一樣既貨先?
    你咁正義不如唔收錢幫人影吖DLLM

    喜歡

留言

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s